Аналітычна я тыднёвая справаздач а па выніках назірання за выбарамі ў Палату прадстаўні коў Нацыянальн ага сходу Рэспублікі Беларусь..pdf

Назіранне за выбарамі ў Палату прадстаўнікоў Нацыянальнага сходу Рэспублікі Беларусь сёмага склікання ажыццяўлялася РПГА "Беларускі Хельсінкскі Камітэт" і ПЦ "Вясна" ў межах кампаніі "Праваабаронцы за свабодныя выбары". Назіральнікі кампаніі адзначалі неактыўны і малазаўважны для большасці выбарчышкаў характар перадвыбарчай агітацыі.

На 6 лістапада ўсяго налічвалася 523 кандыдатаў у дэпутаты, 29 чалавек добраахвотна знялі свае кандыдатуры, у дачыненні да 10 кандыдатаў былі прынятыя рашэнні АВК аб адмене іх рэгістрацыі, два кандыдаты былі адноўленыя вышэйстаячымі камісіямі і судамі. Толькі 330 з зарэгістраваных кандыдатаў надрукавалі свае перадвыбарчыя праграмы ў СМІ. Працягваюцца выпадкі нядопуску ў эфір агітацыйных выступаў апазіцыйных кандыдатаў, пры гэтым АВК і кіраўніцтва дзяржаўных СМІ вельмі шырака прымяняюць абмежаванні падчас агітацыі, устаноўленыя арт. 47 ВК, што ў большасці выпадкаў носіць характар цэнзуры і недапушчальнага абмежавання свабоды выказвання меркаванняў.

Былі зафіксаваны факты адмены АВК рашэнняў аб рэгістрацыі кандыдатаў за нібыта дапушчаныя імі парушэнні арт. 47 ВК і затрыманне супрацоўнікамі міліцыі дзеючага кандыдата ў дэпутаты. Адбываецца выкарыстанне адміністратыўнага рэсурсу пры арганізацыі агітацыйных мерапрыемстваў з удзелам праўладных кандыдатаў у дэпутаты. Абскарджанні рашэнняў АВК аб адмене рэгістрацыі ў вышэйстаячых ТВК і ЦВК, а таксама ў судах у большасці выпадаў былі безвыніковымі. 8 лістапада на пл. Свабоды ў Мінску ў межах агітацыйнай сустрэчы з выбаршчыкамі адбыўся найбольш масавы за выбарчую кампанію сход грамадзянаў. Мерапрыемства было анансавана пражываючым у Польшчы блогерам NЕХТА. Па ацэнках назіральнікаў, у сходзе прынялі ўдзел больш за 500 грамадзян. Супрацоўнікі міліцыі не далі скарыстацца прысутным гукаўзмацняльнай апаратурай, зламаўшы яе. Падчас мерапрыемства была затрыманая здымачная група нямецкіх журналістаў і праз 2,5 гадзіны вызваленая з Цэнтральнага РУУС г. Мінска. 7 лістапада Міжнародная місія назірання за выбарамі БДІПЧ АБСЕ апублікавала прамежкавую справаздачу па выніках назірання за выбарамі.

Як адзначаюць назіральнікі кампаніі, перадвыбарчая агітацыя ў цэлым носіць малазаўважны для шараговых выбаршчыкаў характар. Агітацыя адбываецца шляхам правядзення перадвыбарчых сустрэчаў кандыдатаў і іх давераных асобаў з выбаршчыкамі і падчас выступаў у СМІ. Правядзенне агітацыйных мерапрыемстваў на вуліцы ў асноўным абіраюць прадстаўнікі палітычнай апазіцыі. Праўладныя кандыдаты часцей праводзяць агітацыйныя мерапрыемствы на сустрэчах з выбаршчыкамі ў вызначаных для гэтых мэтаў закрытых памяшканнях – навучальных установах, дамах культуры і г.д. Пры гэтым назіральнікамі адзначаюцца выпадкі выкарыстання адміністратыўнага рэсурсу пры арганізацыі такіх сустрэч.