Download PDF.pdf

Z eisu nungzuite tungah lunggimna lianpi tung hi. Pasian gam hong kiphut ding ci a, a lametna khempeuh tenguh amaa Friday ni-in singlamteh tungah kikilhcip ta hi. Dahna lungmanna lungleenna leh lungzuanna tawh kidimin aom laitak un Cleopas leh alawmpa khat in Jerusalem pan tai sagih gamlatna aom, atenna khua uh Emmaas lam zuan-in hong ciah uh hi. Sunday nitak nitum dektak ta, lampi lah neu hoihlo mahmah a tot laitak un, meltheih loh midang khat in anunglam pan un pha-in hong tonkhawm uh hi. Hih a phapa pen sihna pan a thokik Topa ahih ding pen tawmcik bek upmawhna nei uh hi. Alungkia mahmah alungkham mahmah hih nungzui nihte in, tua kaal sunga thupiangte hangin lametna abeisaknate uh kikum uh hi. Zeisu in limtakin a thugente uh ngai a, hih alungkia mahmah alawmte kiangah kilaakkhia nuam hi. Ahih hangin Laisiangtho sunga thumaan thutak agen pen Zeisu ahih lam nidang sangin tu in atheih ding uh kisam mahmah zaw hi. Hih nungzui nihte in Zeisu pen kua hi takpi hiam cih thei uh hi leh, nasia takin lamdang sa-in agen lai ding thute limtakin ngai zaw lai ding uh hi. Kum thum leh alang sung bang a thuhilhna leh athugennate azak uh hangun, Zeisu sawlna taktak bang hiam cih tel taktak nailo uhhi. Zeisu in siangtakin gen ngei khin zo hi. "Mihing Tapa in amaute khut sungah kipia dinga, amaute in amah that ding uh hi, ahih hangin athah khit uh ni thum ciangin tho kik ding hi, ci hi. Ahih hangin amaute in tel takpi nailo-in, dot kik ding lah dong kik ngamlo uh hi." Mark 9:31-32. Zeisu in tua nihte dahna thu akiho laitak mah botsat-in Laisiangtho leh genkholhna thute a teltheih nadingun nai nih sung thuhilh hi.